NAMAKWALANDSE DRAMATURG WEN GESOGTE TEKSPRYS

D Obies

SPRINGBOK- Die Namakwalandse skrywer, aktrise en teaterskepper Dianne du Toit Albertze is met die gesogte Nagtegaal-teksprys vir 2025, die grootste teksskryfkompetisie in Suid-Afrika, bekroon. Die prys, wat in 2024 in samewerking met die Toyota Stellenbosch Woordfees aangebied is, vereer haar toneelstuk "Huis van sand" en sluit 'n prys van R100 000, asook mentorskap vir die verdere verfyning van haar teks in. Die stuk ontvang ook 'n vertolking by die Woordfees, met die bekroonde aktrise Tinarie van Wyk Loots, in die hoofrol.

Volgens Nico Scheepers, dramaturg en paneellid, is "Huis van sand" vanweë sy meesterlike teatertegnieke, minimalistiese stelontwerp en karakterisering vereer. Hy het Du Toit Albertze se unieke stem en dapper temakeuses geprys.

Die naaswenners was André Gerber met "Die cabinet" in die tweede plek en Lee Doubell met "Kom komeet, kom" in die derde plek. Gerber en Doubell het onderskeidelik R50 000 en R25 000 ontvang, asook mentorskap. Uit 'n totaal van 77 inskrywings is twee verdere skrywers, Philip Rademeyer en Jackie Lätti, vir mentorskap uitgenooi en het elk R12 000 se prysgeld ontvang. Die keuringspaneel, wat bestaan uit gerekende teaterskeppers, het tekste op grond van verhoogmatigheid, narratief, eksperimentele benadering en literêre meriete beoordeel.

Dirk Nagtegaal, medestigter van die prys, het beklemtoon dat die kompetisie nie net gehalteteater bevorder nie, maar ook nuwe geleenthede vir Afrikaanse skrywers skep. Saartjie Botha, direkteur van die Toyota Stellenbosch Woordfees, het die prestige van die prys en die motivering wat dit vir skrywers bring, onderstreep.

Na 'n tydperk van onsekerheid oor haar teaterloopbaan, beskou Du Toit Albertze die prys as 'n welkome herlewing. Sy het onlangs weer die verhoog met haar eenvrouvertoning "Katrina Kakkerlak" betree en is die skrywer van die eerste Afrikaanse transroman, "Bottelnek breek bek", wat die kortlys vir die Jan Rabie-Rapportprys in 2022 gehaal het.

"Huis van sand" verken die impak van kinderjare op volwassenes, veral die tema van toksiese vroulikheid wat van ma na dogter oorgedra word. Die verhaal speel af in 'n karavaanpark in Springbok, waar die karakters hul verlede verwerk en dieper insigte in hul eie ervarings kry.

Du Toit Albertze beskou die verhoog as haar eerste liefde en streef daarna om stories te skryf wat genesing bring. Sy gee erkenning aan Malan Steyn, wat haar aangemoedig het om aan te hou skryf, en beklemtoon die uitdagings van dramaskryf, wat 'n dieper verhouding met die kyker vereis. Met die toekenning vestig Du Toit Albertze haar posisie as een van die belangrikste Afrikaanse dramaturge en as 'n stem wat die gemeenskap en sy diep emosionele landskappe uitbeeld.