SKAAKPRESTASIE BEKLEMTOON STREEK SE TALENT

D Obies

NABABEEP- Onder die bekwame leiding van afrigter André, het 24 talentvolle skaakspelers van regoor die Namakwa-streek na Keimoes gereis om aan die gesogte Kings and Queens-skaakkompetisie deel te neem. Die span, bestaande uit spelers van Carolusberg, Okiep, Bergsig, Port Nolloth en Nababeep, het hul vaardighede en strategiese vernuf saamgesnoer om uitmuntend te presteer.

Die klub het 'n totaal van tien medaljes verower, met 'n indrukwekkende vertoning in die Onder 20-afdeling, waar al vyf beskikbare medaljes ingepalm is. In die Ope afdeling het Cecil Rhodes 'n tweede plek behaal en silwer verwerf, terwyl Moggamat Daries 'n silwer medalje met 'n telling van 5 uit 6 in die Onder 14-afdeling gewen het. Keshan Saal het 'n brons medalje in die Onder 18-afdeling met 'n telling van 4 uit 6 verseker.

Carline Vries het 'n foutlose wedstryd in die Onder 20-afdeling gespeel en goud verower met 'n perfekte 6 uit 6 telling. Keown Sauls, Lebogile Witbooi, David Basson, Johynne Crow en Jaime Carolus-Naidoo het almal silwer medaljes in die Onder 18- en Onder 20-afdelings gewen, wat die klub se diepte en talent onderstreep het. Die klub se Onder 18-kampioen het ook 'n tweede plek in die finale behaal.

André het sy trots oor die spelers, wat volgens hom uiters goed, selfs in buiteklubkompetisies soos die ZFM-toernooie presteer het, uitgespreek. Hy is aktief betrokke by die ontwikkeling van skaak in die streek, reis gereeld na verskillende dorpe om opleiding aan te bied en rig reeds vir twee jaar die provinsiale Onder 15- en Onder 18-seuns- en meisiespanne tydens Skolesport se winter spele af.

Die prestasies van die Nababeep Skaakklub het die aandag van plaaslike leiers geniet. Rodney Kritzinger, burgemeester van die Nama Khoi-koalisie munisipaliteit, het die skaakspan van Port Nolloth en Nababeep besoek en hul prestasies geloof. Hy het die span vroeër vir 'n kompetisie in Kakamas geborg, waar hulle tien van die vyftien medaljes verower het.

Die klub se sukses by die Kings and Queens-kompetisie in Keimoes getuig van harde werk, toewyding en samewerking binne die breër Namakwa-skaakgemeenskap. Onder die inspirerende leiding van hul afrigter, het hierdie jong skaakspelers nie net medaljes verower nie, maar ook 'n bron van trots vir hul dorpe en die streek geword. Hul prestasies beklemtoon die veerkragtigheid van toewyding en die blink toekoms van skaak in die Noord-Kaap.